Gjimnazi ynë karakterizohet nga një stil unik në pjesën e tij të jashtme, saqë nuk të jep përshtypjen e një shkolle, pasi nuk ka ngjashmëri me shkollat shtetërore që shohim vazhdimisht. Mjediset e shkollës janë në një godinë 3-katëshe me infrastrukturë shumë moderne duke siguruar kushte optimale për zhvillimin e gjithë procesit mësimor dhe edukativ. Në këto ambjente ndodhen 12 klasa; biblioteka e shkollës, kabineti i kimisë, biologjisë dhe TIK-ut; salla e madhe për aktivitete si dhe një sallë ngrënieje për nxënësit gjatë minutave të pushimit.

Siç u theksua më lart, shkolla filloi të funksiononte në vitin 2010 ku u regjistruan dy klasa të dhjeta me 56 nxënës. Sot kemi 12 klasa me 360 nxënës, rritje kjo që i ka kaluar parashikimet tona. Kjo statistikë progresive që pasqyron më së miri funksionimin, menaxhimin dhe vizionin e qartë të kësaj shkolle.

⦁ Stafi
“ Do ta kryej detyrimin tim me ndërgjegje dhe krenari. Nxënësit e mi nuk do të jenë vetëm nxënës, por edhe fëmijë dhe kurrë nuk do të harroj që për fatin e tyre edhe vetë mbaj një pjesë të përgjegjësisë. Do ta mbroj me të gjitha mjetet ekzistuese nderin e profesionit të arsimtarit. Kolegët e mi çdo herë do të jenë edhe miqt e mi. Në bashkëpunim me ta do të përpiqem që vazhdimisht ta përkryej veprimtarinë e shkollës në kuptimin efikas të njohjes së të gjitha të drejtave në edukimin dhe barazinë sociale në arsim. Këtë betim solemn e jap plotësisht në mënyrë të lirë dhe me nder.”

( teksti i betimit të mësuesit i përpiluar nga R. Dotters më 1966 për nevojat e UNESKO-s) Nuk mund të kuptohet dhe as të shkruhet i plotë historiku i shkollës pa misionarët e saj, mësuesit. Krahas kritereve profesionale e psikologjike të mirëpërcaktuara për mësuesit, specifike për shkollën tonë janë cilësitë si: pasioni, dashamirësia, shembulli personal etj. që formatojnë më së miri bashkësinë edukative. Procesi i edukimit shoqërohet me një angazhim të vazhdueshëm dhe pikë referimi ndaj të cilave nxënësit afrohen me një besim në një suazë të përbashkët.

Numri i mësuesve gjithnjë në rritje është shoqëruar me shkallën e lartë të kualifikimit, jo vetëm universitar por dhe pasuniversitar. Specifika e pedagogjisë së tyre (si dhe sekreti i një rezultati cilësor) është se aplikojnë “Pedagogjinë Rogacioniste”.
Këndvështrimi i kësaj pedagogjie është që: nxënësi nuk ka ardhur në këtë botë vetëm për të shtuar numrin e popullsisë, por ka ardhur si një qenie e papërsëritshme, si një projekt i ri, i cili do të gjejë identifikimin absolut dhe plotësimin ekzistencial.

– Rritja e stafit ndër vite

Në vitin e parë që kjo shkollë u hap stafi përbëhej nga 10 mësues, ndërsa sot në shkollën tonë është një staf me kohë të plotë 17 mësues ndërsa me kohë të pjesshmë 7 mësues, 1 psikolog, 1 punonjës social dhe staf mbështetës 6 persona.
Një vizion i tillë e veçon dhe e identifikon bashkësinë edukative të kësaj shkolle.